काठमाडौँ। सरकारले त्रिशूलीमा हराएका बस र बेपत्ता यात्रुको खोजी गर्नका लागि भारत पश्चात् अब चीनसँग सहयोग माग्ने भएको छ।
गृह मन्त्रालयका अनुसार त्रिशूलीमा बेपत्ता रहेको बस खोज्नका लागि चीनसँग सहयोग माग्ने तयारी भएको जनाएको छ । बुधवार संसद्को राज्य व्यवस्था तथा सुशासन समितिको बैठकमा गृह सचिव एकनारायण अर्यालले उक्त विषयमा जानकारी दिएका हुन् ।
यस अगाडि उक्त बेपत्ता बस र यात्रुको खोजी गर्नका लागि गत साउन ५ गते उच्च नेशनल डिजास्टर रेस्पोन्स फोर्स (एनडीआरएफ) को प्रविधियुक्त भारतीय टोली नेपाल ल्याइएको थियो । उक्त टोलीले समेत पहिरोमा बेपत्ता यात्रु बस नभेटेपछि फर्किएको थियो ।
मुग्लिन –नारायणघाट सडकअन्तर्गत सिमतालमा २८ असारमा लेदो सहितको पहिरोमा परी दुई वटा बस बगेका थिए । बसमा सवार ६५ यात्रुमध्ये ३ जना पौडिएर बाहिर निस्किएका थिए । हालसम्म २४ वटा शव फेला परेका छन् ।
