काठमाण्डौ । सरकारले चालु वर्षका लागि उखुको न्यूनतम खरिद मूल्य निर्धारण गरेको छ। सोमबार बसेको मन्त्रिपरिषद् बैठकले उखुको मूल्य प्रति क्विन्टल ६२० रुपैयाँ तोक्ने निर्णय गरेको हो।
मंगलबार आयोजित पत्रकार सम्मेलनमा सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलले मन्त्रिपरिषद्का निर्णयहरू सार्वजनिक गर्दै उखु किसानका लागि प्रति क्विन्टल ७० रुपैयाँ अनुदान प्रदान गर्ने व्यवस्था समेत मिलाइएको जानकारी दिए। उनका अनुसार यो निर्णय कृषि तथा पशुपक्षी विकास मन्त्रालयको प्रस्तावका आधारमा गरिएको हो।
प्रवक्ता खरेलले सोमबार बसेको मन्त्रिपरिषद् बैठकका १८ वटा निर्णय एकसाथ सार्वजनिक गरेका छन्। सरकारका अनुसार उखु किसानको हित संरक्षण र कृषि उत्पादनमा प्रोत्साहन गर्ने उद्देश्यले न्यूनतम खरिद मूल्य र अनुदान दर संशोधित गरिएको हो।
