काठमाडौं । द ब्रिटिश कलेज (TBC) ले आफ्नो इनक्युबेशन सेन्टरबाट पहिलो रूपमा विकसित भएको विद्यार्थी–नेतृत्वमा आधारित स्टार्टअप गो दान को औपचारिक शुभारम्भ गरेको छ। यो शुभारम्भले टिबिसीको उद्यमशीलता तथा नवप्रवर्तनप्रतिको प्रतिबद्धतामा एक महत्वपूर्ण माइलस्टोन स्थापित गरेको छ।
गो दान नेपालभर सरल, सुरक्षित र पारदर्शी डिजिटल सहयोग (fundraising) सुविधा प्रदान गर्ने उद्देश्यले विकसित गरिएको प्लेटफर्म हो। यसका संस्थापक अभूषण श्रेष्ठ, BSc (Hons) Computer Science – AI का लेभल 4 विद्यार्थी,ले कार्यक्रमका क्रममा आफ्ना प्रेरणा र प्लेटफर्मको लक्ष्य साझा गरे।
कार्यक्रममा बोल्दै उनले भने, “गो दानको उद्देश्य कठिन समयमा सहयोग पाउन मानिसहरूलाई सजिलो बनाउनु हो। टिबिसी इनक्युबेशन सेन्टरको मार्गदर्शनले हामीले पहिलो सफल कदम चालेका छौँ।”
शुभारम्भ समारोहमा विद्यार्थी, शिक्षक तथा टिबिसी नेतृत्वको उपस्थिति थियो। टिबिसीका अकाडेमिक डाइरेक्टर डा. डेक्लन पी. ब्यानन ले टोलीलाई बधाई दिँदै भने, “यो सफलताले हाम्रो इनक्युबेशन इकोसिस्टमले प्रवर्धन गर्न खोजेको वास्तविक उपलब्धि देखाउँछ।”
समूह CEO तथा संस्थापक राजेन कँडेल ले युवा उमेरमै व्यवसाय सुरु गरेको आफ्नो अनुभव सुनाउँदै भने, “सुरुवात गर्न साहस चाहिन्छ, र त्यो साहसलाई टिबिसीले सदैव प्लेटफर्म दिन्छ।”
गो दानको सफल शुभारम्भसँगै टिबिसीले विद्यार्थीहरूलाई नवप्रवर्तन, सहकार्य र प्रभावकारी उद्यम निर्माणतर्फ अझ सशक्त रूपमा अघि बढाउने संकेत गरेको छ।
