काठमाडौं । कात्तिक ९ गते युवा तथा खेलकुद मन्त्री नियुक्त भएका बब्लु गुप्ताले पदबाट राजीनामा दिएका छन्। मन्त्री गुप्ताले आफूले राजीनामा दिने निर्णयबारे प्रधानमन्त्रीलाई जानकारी गराइसकेको र हाल औपचारिक प्रक्रिया अगाडि बढिरहेको बताएका छन्।
मन्त्री गुप्ता पछिल्लो केही समयदेखि अमेरिका भ्रमणसम्बन्धी विषयलाई लिएर विवादमा तानिँदै आएका थिए। उक्त भ्रमणको उद्देश्य, प्रक्रिया र त्यसमा देखिएको अपारदर्शिताबारे प्रश्न उठेपछि सामाजिक सञ्जालदेखि राजनीतिक वृत्तसम्म तीव्र आलोचना सुरु भएको थियो।
आलोचना बढ्दै गएपछि प्रधानमन्त्रीसमेत मन्त्री गुप्ताको कार्यशैलीप्रति असन्तुष्ट रहेको बताइएको छ। स्रोतका अनुसार विवादले सरकारको छवि प्रभावित हुन थालेपछि प्रधानमन्त्रीले मन्त्री गुप्तासँग स्पष्टीकरण मागेका थिए। तर विवाद साम्य हुने संकेत नदेखिएपछि मन्त्री गुप्ताले नैतिक जिम्मेवारी लिँदै राजीनामा दिने निर्णय लिएको बताइएको छ।
राजीनामा दिने निर्णयबारे प्रतिक्रिया दिँदै मन्त्री गुप्ताले आफूविरुद्ध उठेका विषयले सरकार र मन्त्रालयको काममा असर नपरोस् भन्ने उद्देश्यले पदबाट अलग हुने निर्णय गरेको बताएका छन्। उनले प्रक्रिया पूरा भएपछि औपचारिक रूपमा राजीनामा स्वीकृत हुने विश्वास व्यक्त गरेका छन्।
