काठमाडौँ । साइबर सुरक्षासम्बन्धी अनुसन्धान गर्ने संस्था ‘युनिट ४२’ ले अन्तर्राष्ट्रिय स्तरको एक गम्भीर साइबर जासुसी गतिविधि सार्वजनिक गरेको छ।
अनुसन्धानअनुसार एसियाली क्षेत्रमा सक्रिय रहेको टीजीआर–एसटीए–१०३० नामक ह्याकर समूहले विश्वका ३७ मुलुकका ७० भन्दा बढी सरकारी निकाय तथा संवेदनशील पूर्वाधार प्रणालीहरूमा अवैध रूपमा प्रवेश गर्न सफल भएको छ।
यस अभियान अन्तर्गत नेपालस्थित प्रधानमन्त्री कार्यालयदेखि जर्मनी, चेक गणतन्त्र र ब्राजिलका विभिन्न मन्त्रालयसम्म लक्षित गरिएको पाइएको छ।
ह्याकरहरूले ‘स्याडो–गार्ड’ भनिने नयाँ प्रकारको लिनक्स आधारित रुटकिट प्रयोग गरेको अनुसन्धानकर्ताहरूले बताएका छन्।
विश्लेषणले देखाएअनुसार समूहको मुख्य निशाना आर्थिक कूटनीतिक छलफल, सैन्य गतिविधिका विवरण तथा खानीजस्ता प्राकृतिक स्रोतसँग सम्बन्धित गोप्य तथ्यांक संकलन गर्नु रहेको छ।
उता, अमेरिकी साइबर सुरक्षा निकायले उक्त समूहको गतिविधिप्रति गम्भीर चिन्ता व्यक्त गर्दै अन्तर्राष्ट्रिय साझेदारहरूसँग सहकार्य गरी यस्तो साइबर खतरा नियन्त्रण गर्न प्रयास भइरहेको जनाएको छ।
