काठमाडौँ। राष्ट्रपति रामचन्द्र पौडेलको निमन्त्रणामा दुई दिने राजकीय भ्रमणका लागि नेपाल भ्रमणमा रहेका कतारका राजा अमिर शेख तमिम बिन हमाद अल थानी र प्रधानमन्त्री पुष्पकमल दाहाल प्रचण्डबिच आज औपचारिक भेटवार्ता हुने भएको छ ।
बिहान १० बजेपछि होटल सोल्टीमा उक्त सम्झौता हुनेछ। उक्त भेटवार्तामा विभिन्न ६ वटा विषयमा द्विपक्षीय सम्झौता पत्रमा हस्ताक्षर गरिने कार्यसूची तयार भएको हो। आज शिक्षा र संस्कृति आदान प्रदानसँग सम्बन्धित विषयमा हस्ताक्षर हुने भएको छ।
नेपाल र कतारको सरकारी समाचार एजेन्सी, महान्याधिवक्ताको कार्यालय र इन्स्टिच्युट अफ फरेन अफेयर्ससँग सम्बन्धित विषयमा तालिम र सहयोग आदान प्रदान सम्बन्धी हस्ताक्षर हुनेछ । यस्तै अन्य विभिन्न सम्झौतामा हस्ताक्षर हुने कार्यक्रम रहेको छ ।
कतारी अमिर र प्रधानमन्त्री प्रचण्ड नेतृत्वको द्विदेशीय प्रतिनिधिमण्डलबीचको वार्तामा नेपाल–कतार सम्बन्धका समग्र पक्षमा विचार विमर्श हुनका साथै क्षेत्रीय र अन्तर्राष्ट्रिय चासोका विषयमा छलफल हुने परराष्ट्र मन्त्रालयले जनाएको छ ।
नेपाल र कतारबिचको युवा तथा खेलकुद सहयोग, उच्च शिक्षा तथा वैज्ञानिक अनुसन्धानका क्षेत्रमा सहयोगसम्बन्धी समझदारी पत्रमा हस्ताक्षर हुनेछ ।
दुई देशबिच कला र संस्कृति, महान्यायाधिवक्ताको कार्यालयसम्बन्धी र वैदेशिक मामिलासम्बन्धी सम्झदारीपत्रमा हस्ताक्षर गर्ने कार्यक्रम रहेका परराष्ट्र मन्त्रालयको भनाई छ । त्यस्तै चर्चामा रहेको कतारी राजालाई हात्ती उपहार विषयमा सम्झौता नुहेन र प्रधानमन्त्रीले हात्ती दिने भनेर घोषणा मात्रै गर्ने कार्यक्रम रहेको छ ।
अन्तर्राष्ट्रिय कानुनको प्रक्रिया पूरा गर्न बाँकी भएकाले हात्ती उपहार दिने विषयमा सम्झौता नहुने परराष्ट्र मन्त्रालयले जनाएको छ । सम्झौता हस्ताक्षर पश्चात् प्रधानमन्त्री प्रचण्डले होटल द्वारिकामा दिवा भोजको कार्यक्रम आयोजना गर्नेछन् । कतारी टोली आज दिउँसो कतार फर्किने कार्यक्रम रहेको छ ।
