काठमाडौं । चालु आर्थिक वर्ष २०८२/८३ को पहिलो दुई महिनामा काँकरभिट्टा नाकाबाट आयातमा वृद्धि भए पनि निर्यात भने उल्लेख्य मात्रामा घटेको छ। मेची भन्सार कार्यालयका अनुसार साउन–भदौमा रु ८ अर्ब १९ करोड १ लाख बराबरका मालसामान आयात भएका छन्। यो रकम अघिल्लो वर्षको सोही अवधिको तुलनामा करिब ९ प्रतिशत (रु ६८ करोड ८ लाख) बढी हो। गत वर्ष सोही अवधिमा आयात रकम रु ७ अर्ब ५० करोड ९२ लाख थियो।
निर्यातमा २० प्रतिशतभन्दा बढी गिरावट
आयात बढेको विपरीत चालु वर्षको पहिलो दुई महिनामा निर्यात भने घटेको छ। यस अवधिमा रु ३ अर्ब ६ करोड ३७ लाख बराबरका वस्तु निर्यात भएका छन्। गत आवमा सोही अवधिमा निर्यात रकम रु ३ अर्ब ८६ करोड २८ लाख रहेकोमा चालु वर्ष करिब २०.६९ प्रतिशत ले कमी आएको छ।
मुख्य आयात–निर्यात वस्तु
निर्यात हुने वस्तु : अलैँची, चिया, फलामे पाता, प्लाइउड, छुर्पी, अम्रिसो, भेनिउर सिट, मोलासिसलगायत। आयात हुने वस्तु : पेट्रोलियम पदार्थ, जुट, दलहन, पशु आहाराको कच्चा पदार्थ, तरकारी, फलफूल, खनिज उत्पादन, तयारी कपडालगायत।
राजस्व संकलनमा वृद्धि
काँकरभिट्टा नाकाबाट आयात–निर्यात व्यापारमार्फत चालु आवको दुई महिनामा रु २ अर्ब ६२ करोड ९५ लाख १८ हजार राजस्व संकलन भएको छ। यो रकम अघिल्लो आवको सोही अवधिको तुलनामा ८.६२ प्रतिशत (रु २० करोड ८६ लाख ९ हजार) बढी हो।
