काठमाडौं । जिम्मा लिएको काम समयमै सम्पन्न नगर्ने १४ वटा निर्माण कम्पनीलाई सार्वजनिक खरिद अनुगमन कार्यालयले कालो सूचीमा राखेको छ। प्रधानमन्त्री कार्यालय मातहतको सो कार्यालयले बुधबार सूचना जारी गर्दै विभिन्न निकायबाट प्राप्त सिफारिसका आधारमा ती कम्पनीलाई कालो सूचीमा राखिएको जनाएको छ।
कार्यालयद्वारा जारी सूचनामा भनिएको छ, “सार्वजनिक खरिद ऐन, २०६३ को दफा ६३ को उपदफा (१) बमोजिम जिम्मा लिएको काम समयमै सम्पन्न नगर्ने निर्माण कम्पनीलाई कालो सूचीमा राखिएको छ।”
कालो सूचीमा परेका कम्पनीहरूलाई ६ महिनादेखि एक वर्षसम्म सार्वजनिक खरिद सम्बन्धी कुनै पनि बोलकबोल, ठेक्का वा खरिद प्रक्रियामा भाग लिन रोक लगाइने भएको छ।
यससँगै, कार्यालयले सार्वजनिक निकायलाई ती कम्पनीसँग नयाँ सम्झौता नगर्न र ठेक्का प्रक्रियामा सहभागी गराउन नपाइने स्पष्ट पारेको छ।
