ललितपुर निर्वाचन क्षेत्र नम्बर ३ बाट राष्ट्रिय स्वतन्त्र पार्टी (रास्वपा) की उम्मेदवार डा. तोसिमा कार्की प्रतिनिधिसभा सदस्यमा निर्वाचित भएकी छिन्। शुक्रबार साँझ सार्वजनिक भएको अन्तिम मतपरिणामअनुसार उनले आफ्ना प्रतिस्पर्धीलाई उल्लेख्य मतान्तरले पराजित गर्दै जित हात पारेकी हुन्।
निर्वाचन अधिकृत धर्मराज पौडेलका अनुसार कार्कीले कुल ३१ हजार १३६ मत प्राप्त गरेकी छन्। उनका निकटतम प्रतिद्वन्द्वी नेकपा एमालेका अमृत खड्काले १८ हजार १६३ मत पाएका छन्।
यससँगै कार्कीले खड्कालाई १२ हजार ९७३ मतान्तरले पछाडि पार्दै प्रतिनिधिसभामा प्रवेश गरेकी हुन्।
यसै निर्वाचन क्षेत्रमा नेकपाकी उम्मेदवार पम्फा भुसाल भने तेस्रो स्थानमा सीमित भइन्। उनले ८ हजार ७६९ मत मात्र प्राप्त गरेकी छन्।
