काठमाडौँ । दसैँ नजिकिएसँगै उपत्यकाबाट बाहिरिने यात्रुहरूको चाप ह्वात्तै बढेको छ। उपत्यका ट्राफिक प्रहरी कार्यालयका तथ्याङ्कअनुसार असोज १ देखि ५ गतेसम्म मात्र २९ हजार ३६० सार्वजनिक सवारीमार्फत एक लाख ८९ हजार २१८ यात्रु काठमाडौँ उपत्यकाबाट विभिन्न जिल्लाका लागि बाहिरिएका छन्।
यात्रु चाप बढेसँगै यातायात क्षेत्रले ठूलो दबाब खेपिरहेको छ। उपत्यकाबाट बाहिरिने प्रमुख नाकाहरू – थानकोट, साँगा, दक्षिणकाली र बालाजुमा यात्रुको भीड देखिएको छ।
लगातारको वर्षा र पहिरोले राजमार्गमा सवारी सञ्चालन कठिन भएको नेपाल यातायात व्यवसायी महासंघले जनाएको छ । “समयमै बस काठमाडौँ नपुग्दा यात्रुलाई पठाउन ढिलाइ भइरहेको र यसले व्यवस्थापनलाई नै चुनौती दिएको महासंघको भनाई छ।
यस्तो बाधा हुँदाहुँदै पनि यात्रुहरूको घर फर्कने चाहना भने रोकिएको छैन। गोङ्गबुस्थित नयाँ बसपार्कमा पछिल्ला दिनमा यात्रुको चाप निरन्तर बढिरहेको छ। अधिकांश यात्रुहरू अध्ययन, व्यापार र रोजगारीका लागि काठमाडौँ बस्दै आएका छन्। तर, चाडपर्वको बेला उनीहरू सामाजिक र सांस्कृतिक सम्बन्ध कायम राख्न आफ्ना गन्तव्यतिर फर्किरहेका छन्।
