काठमाडौं – दसैं, तिहार र छठ पर्वको अवसरमा वायुसेवा कम्पनीहरूले सरकारले तोकेको अधिकतम भाडा दरभन्दा कममा टिकट उपलब्ध गराइरहेको र आगामी दिनमा पनि सोही दर कायम राख्ने प्रतिबद्धता व्यक्त गरेका छन्।
नेपाल वायुसेवा संघका अनुसार यात्रुहरूले चाडपर्वमा सहज यात्रा गर्न सकुन् भन्ने उद्देश्यले कर्मचारीहरू विशेष खटिएका छन्। संघले यात्रुबाट बढी भाडा लिइएको भन्ने गुनासो आएको उल्लेख गर्दै, वायुसेवा कम्पनीहरूले तोकिएको मूल्यभन्दा बढी टिकट बिक्री नगरेको स्पष्ट पारेको छ।
संस्कृति, पर्यटन तथा नागरिक उड्डयन मन्त्रालयका सचिव हरिप्रसाद मैनालीको अध्यक्षतामा असोज ८ गते बसेको बैठकमा नेपाल नागरिक उड्डयन प्राधिकरणका उच्च पदाधिकारी तथा वायुसेवा कम्पनीका प्रतिनिधिहरूले पनि चाडपर्वको समयमा टिकट मूल्य बढाउने कुनै योजना नभएको जानकारी दिएका थिए।
संघका अनुसार हाल दुर्गम क्षेत्रहरूमा उडान चाप कम रहेको कारण त्यहाँ पनि निर्धारित दरमै टिकट उपलब्ध रहेका जनाएको छ ।
