काठमाडौं — जल तथा मौसम विज्ञान विभागको मौसम पूर्वानुमान महाशाखाले हाल मनसुनको न्यूनचापीय रेखा सरदर स्थानमा रहेको र अरब सागर तथा बंगालको खाडीबाट आएको जलवाष्पयुक्त हावाको प्रभाव देखिएको जनाएको छ।
महाशाखाका अनुसार अहिले देशभर सामान्य बदली छ भने बागमती, गण्डकी र कर्णाली प्रदेशका केही स्थान तथा अन्य प्रदेशका एक–दुई स्थानमा हल्कादेखि मध्यम वर्षा भइरहेको छ।
आज दिउँसो देशभर सामान्य बदली रहने र बागमती, लुम्बिनी तथा देशका पहाडी भूभागका थोरै स्थानमा मध्यम वर्षाको सम्भावना छ। साथै, कोशी, बागमती, कर्णाली प्रदेशका पहाडी भूभाग र लुम्बिनीका तराई क्षेत्रमा एक–दुई स्थानमा भारी वर्षा हुने सम्भावना छ।
आज राति कोशी, मधेस, बागमती र गण्डकी प्रदेशसहित देशका पहाडी भूभागमा सामान्य बदली रहनेछ भने अन्य स्थानमा आंशिक बदली रहनेछ।
विभागले वर्षाका कारण पहिरो, गेग्रान बहाव र नदी–नालामा पानीको सतह बढ्ने जोखिम रहेको बताउँदै यातायातसहित अन्य क्षेत्रमा असर पर्न सक्ने चेतावनी दिएको छ। साथै, सबैलाई सतर्क रहन र पूर्वतयारी गर्न अनुरोध गरेको छ।
