काठमाडौँ । पुँजी बजारमा आज भारी गिरावट देखिएको छ। गत बिहिबार बजार दोहोरो अंकले बढेर सकारात्मक सर्किटसम्म पुगेको बजारमा आइतबार फेरि पहिरो गएको हो। बजार घट्दा लगानीकर्ताले अर्बौं रुपैयाँको लगानी गुमाएका छन्।
नेपाल स्टक एक्सचेञ्ज (नेप्से) आज ७८.८३ अंकले घटेर २५०३.३५ बिन्दुमा पुगेको छ।
आजको कारोबारमा सबैभन्दा बढी गिरावट होटल तथा पर्यटन समूहमा देखिएको छ, जहाँ शेयर मूल्य ४.८४ प्रतिशतले घटेको छ। त्यसैगरी, वाणिज्य बैंक समूह २.३० प्रतिशत, विकास बैंक समूह २.९३ प्रतिशत र फाइनान्स समूह ३.६७ प्रतिशतले मूल्य घटेको छ।
बजार सुधारका लागि केन्द्रीय बैंकले गरेको नीतिगत सुधार र बैंकहरूको लगानी क्षमता वृद्धि, शेयर धितो कर्जामा सीमा हटाउने तथा दोस्रो बजारमा लगानी सहज बनाउने निर्णय दीर्घकालीन रूपमा लाभदायक देखिए पनि तत्काल बजारमा त्यसको सकारात्मक प्रभाव देखिएको छैन।
विशेषज्ञहरूका अनुसार, बजारमा सुरुवातदेखि नै भारी गिरावट हुँदा लगानीकर्ताले आत्तिएर शेयर बिक्री गरेपछि बजार अझ ओरालो लागेको हो। यसले छोटो अवधिमा लगानीकर्तामा आर्थिक क्षति र मनोबलमा गिरावट ल्याएको छ।
