काठमाडौँ । आगामी फागुन २१ गते हुने प्रतिनिधि सभा निर्वाचनमा भदौ २७ गतेसम्म मतदाता नामावलीमा नाम दर्ता गराएका व्यक्तिले मात्र मतदान गर्न पाउने भएका छन्। मतदाता नामावली ऐन २०७३ अनुसार निर्वाचन मिति घोषणा भइसकेपछि नयाँ नाम दर्ता हुन सक्दैन।
तर, नागरिकता बनाउँदा मतदाता नामावलीमा नाम दर्ता गराइसकिएको र निर्वाचनको अघिल्लो दिन अर्थात् फागुन २० गते १८ वर्ष पूरा हुने व्यक्तिले मतदान गर्न पाउने छन्। उदाहरणका लागि, यदि तपाईंकी छोरी वा छोरा फागुन २० मा १८ वर्ष पूरा गर्छन् तपाईंले उनीहरूको नागरिकता बनाइदिनुभएको छ र मतदाता नामावली पनि दर्ता गराउनुभएको छ भने उनीहरूले फागुन २१ मा नागरिकता देखाई मतदान गर्न सक्नेछन्। तर नागरिकता बनाउने बेला वा त्यसपछि पनि मतदाता नामावलीमा नाम नलेखाएको भए उनीहरूले भोट हाल्न पाउने छैनन्।
निर्वाचन आयोगको तथ्यांकअनुसार २०८१ चैत ३१ सम्म देशमा १ करोड ८१ लाख ४८ हजार ६ सय ५४ मतदाता छन् । जुन २०७९ को प्रतिनिधि सभा निर्वाचनको भन्दा १ लाख ६० हजार बढी हो। पछिल्लो २८ महिनामा मासिक औसत ५ हजार ७ सय १७ जनाले मतदाता नामावलीमा नाम थपेका छन्। यस आधारमा आउँदो चुनावमा करिब १ करोड ८१ लाख ७६ हजार मतदाता हुने अनुमान गरिएको छ।
तर, अन्तिम मतदाता संख्या यकिन नभएको आयोगले जनाएको छ। निर्वाचनको केही समयपछि मतदाता नामावलीमा दोहोरो नाम भएका र मृत्यु भएका व्यक्तिहरूको विवरण हटाउने दाबी–विरोधको प्रक्रिया पनि हुन्छ।
फागुन २१ को निर्वाचन घोषणा भएपछि नयाँ मतदाता नाम दर्ता बन्द भएको र कानुनअनुसार यसलाई खोल्न सरकारले अध्यादेश ल्याउनु पर्ने अवस्था छ। आयोगका पदाधिकारीहरूले भने, “आयुक्तहरूबीच छलफलपछि यसबारे नयाँ निर्णय आउन सक्छ।”
यसरी, आगामी निर्वाचनमा मतदान गर्न चाहनेले आफ्नो नाम दर्ता भएको सुनिश्चित गर्नु जरुरी छ।
