काठमाडौं । मधेश प्रदेशमा तीन जना नयाँ मन्त्री नियुक्त भएका छन्। नव–नियुक्त मुख्यमन्त्री सरोजकुमार यादवको सिफारिसमा प्रदेश प्रमुख सुमित्रा सुवेदी भण्डारीले आज बिहान तीन जना मन्त्रीहरूलाई पद तथा गोपनीयताको शपथ गराएकी हुन्।
नयाँ मन्त्रीहरूमा नेकपा (एमाले) बाट लखन दास, समाजवादी पार्टीबाट विमला अन्सारी, र राष्ट्रिय प्रजातन्त्र पार्टी (राप्रपा) बाट कञ्चन विच्छा रहेका छन्। शपथ ग्रहणपछि उनीहरूलाई हाललाई मन्त्रालयको जिम्मेवारी तोकिएको छैन। मन्त्रालयहरूको विभाजनबारे छलफल जारी रहेको बताइएको छ।
यसअघि आज बिहानै प्रदेश प्रमुख भण्डारीले एमाले केन्द्रीय सदस्य एवम् संसदीय दलका नेता सरोजकुमार यादवलाई मुख्यमन्त्रीमा नियुक्त गरेकी थिइन्। नियुक्तिपत्र भने उनले बर्दिबास र सिन्धुलीको सिमानास्थित पानस होटलमा प्रदान गरेकी थिइन्।
