काठमाडौँ । ऊर्जा, जलस्रोत तथा सिँचाइ मन्त्री तथा भौतिक पूर्वाधार, यातायात र सहरी विकास मन्त्री कुलमान घिसिङले झापाका बाढी प्रभावित क्षेत्रको आज बिहान स्थलगत अवलोकन गरेका छन्।
मन्त्री घिसिङले अर्जुनधारा नगरपालिका र झापा गाउँपालिकामा कनकाई तथा विरिङ नदीले पुर्याएको क्षतिको निरीक्षण गर्दै प्रभावित पुल, सडक र बस्तीको अवस्थाको प्रत्यक्ष मूल्याङ्कन गरेका थिए। विशेष गरी बुट्टाबारीबाट सालबारी हुँदै चियापानी हुँदै कालिस्थान जोड्ने सडक र मङ्गलमडी मार्गको अवस्थालाई उनले ध्यानपूर्वक अवलोकन गरेका छन्।
झापाका सहायक प्रमुख जिल्ला अधिकारी तेजप्रकाश प्रसाइँका अनुसार मन्त्री घिसिङले हुलाकी सडकखण्डअन्तर्गत कनकाईमाई खोलामा निर्माणाधीन पुल र वर्षाका कारण दबिएको सानोमाई पुलको अवलोकन गरेका थिए। साथै, उनले प्रभावित क्षेत्रका बासिन्दासँग सङ्क्षिप्त अन्तरक्रिया गरी उनीहरूको अवस्था बुझेका थिए।
मन्त्री घिसिङले अवलोकनको क्रममा प्रभावित क्षेत्रको तत्काल उद्धार, सडक तथा पुल मर्मत र दीर्घकालीन पूर्वाधार सुधारका आवश्यक कदमहरू चाँडो उठाउने प्रतिबद्धता जनाएका छन्।
