काठमाडौँ। निर्वाचन आयोगले आगामी प्रतिनिधि सभा सदस्य निर्वाचनका लागि राजनीतिक दलहरूलाई समानुपातिक प्रतिनिधित्व (पीआर) तर्फका उम्मेदवारहरूको बन्द सूची पेस गर्ने म्याद तोकेको छ।
आयोगका अनुसार मंसिर २१ गतेदेखि २३ गतेसम्म समानुपातिक निर्वाचन प्रणालीतर्फ सहभागी हुन इच्छुक राजनीतिक दलहरूले आवश्यक निवेदन पेश गर्नुपर्नेछ। आवेदन कार्यालय समयभित्र काठमाडौँ, कान्तिपथस्थित मुख्य निर्वाचन अधिकृतको कार्यालय (बहादुर भवन) मा पेश गर्न आयोगले सार्वजनिक सूचनामार्फत आग्रह गरेको छ।
आयोगले राजनीतिक दलहरूले निवेदन प्रतिनिधि सभा सदस्य समानुपातिक निर्वाचन निर्देशिका, २०८२ को अनुसूची–२ बमोजिमको ढाँचामा तयार गरी पेश गर्नुपर्ने स्पष्ट पारेको छ।
यस्तै, उम्मेदवारको बन्द सूची नपेस गर्ने राजनीतिक दलले समानुपातिक निर्वाचन प्रणालीतर्फ दल दर्ता गरिरहन आवश्यक नरहने व्यवस्था रहेको आयोगले जनाएको छ।
