सिन्धुलीमा निर्माणाधीन हिमालयन फुड कम्पनीमा कामदारबीच झडप हुँदा ७ जना घाइते

काठमाडौँ। सिन्धुलीको मरिणमा निर्माणाधीन हिमालयन फुड कम्पनीमा कामदारबीच झडप हुँदा ७ जना घाइते भएका छन्। प्रहरीका अनुसार, सोमबार बिहान मरिण गाउँपालिका–४ साहानस्थित उक्त उद्योगमा मजदुरबीच आपसी विवादले हिंसात्मक झडपको रूप लिएको थियो। घाइतेमध्ये २ जना नेपाली र ५ जना चिनियाँ नागरिक छन्।

झडपको सुरुवात मरिण–६ धमिलेका ३० वर्षीय नवराज बम्जनलाई कामबाट निकालिएको विषयमा मतभेद भएपछि भएको हो।

चिनियाँमध्ये ३८ वर्षीय मिस्टर याङको कान र टाउकोमा चोट लागेको छ। ४५ वर्षीय याङ हाइबोको बायाँ हातमा, ४० वर्षीय छ्याङ छोङको छातीमा, ४६ वर्षीय चुजेनको टाउको र मुखमा र ३१ वर्षीय लेउसेन्सीको टाउकोमा चोट लागेको छ।

घटनापछि कम्पनी परिसरमा केही समय तनाव रह्यो, तर अहिले स्थिति नियन्त्रणमा आएको प्रहरीले जनाएको छ। घटनाबारे थप अनुसन्धान जारी छ।