काठमाडौं । नेपाल धितोपत्र बोर्ड (सेबोन) ले मुद्दती निक्षेपमा लगानी गर्ने भएको छ । यसका लागि बोर्डले वाणिज्य बैंकहरूसँग एक वर्षे ब्याजदर उल्लेख गरेर पाँच दिनभित्र आवश्यक कागजातसहितको सिलबन्दी प्रस्ताव बुझाउन आह्वान गरेको छ ।
बैंकिङ प्रणालीमा हाल अत्यधिक तरलता रहेको कारणले वाणिज्य बैंकहरूले ठूलो आकारका निक्षेप अस्वीकार गर्दै आएका छन् । मागभन्दा बढी तरलता भएको अवस्थाले पछिल्ला दुई वर्षदेखि बैंकहरूले ब्याजदर लगातार घटाएका छन् ।
संस्थागत निक्षेपकर्ताले हाल मुद्दती निक्षेपमा करिब २.७५ प्रतिशत मात्र ब्याज पाउँदै आएका छन् । यो दर विगतको तुलनामा निकै न्यून भएकाले बैंकिङ प्रणालीमा निक्षेपकर्ताले आकर्षक प्रतिफल पाउन नसकेको देखिन्छ ।
सेबोनको यो कदमलाई आफ्ना कोष सुरक्षित रूपमा परिचालन गर्ने उपायका रूपमा लिइएको छ । साथै, यसले वाणिज्य बैंकहरूलाई ब्याजदर प्रस्तावमा थप प्रतिस्पर्धी बन्ने दबाब समेत सिर्जना गर्ने अपेक्षा गरिएको छ ।
