काठमाडौँ, देशभरिका ११ उपमहानगरपालिकामध्ये बुटवल उपमहानगरपालिका कार्यसम्पादन मूल्यांकनमा सबैभन्दा अगाडि रहेको छ।
राष्ट्रिय प्राकृतिक स्रोत तथा वित्त आयोगले बिहीबार सार्वजनिक गरेको मूल्यांकन अनुसार, बुटवलले ६४.४४ अंक पाएको छ भने सबैभन्दा कमजोर प्रदर्शन इटहरी उपमहानगरपालिकाले गरेको छ, जसले ३८.९६ अंक मात्र प्राप्त गरेको छ।
दाङका दुई उपमहानगर तुल्सीपुर र घोराही क्रमशः ६१.५३ र ६१.०८ अंक पाएका छन्। धरान उपमहानगरले ४९.७६ अंक हासिल गरेको देखिन्छ। आयोगले स्थानीय तहको मूल्यांकनका लागि १७ सूचक अपनाएको छ।
यसमा बजेट सार्वजनिक र पास गर्ने समय, घरजग्गा रजिस्ट्रेसन शुल्क, मनोरञ्जन तथा विज्ञापन करको मासिक दाखिला, बजेट प्रक्षेपण, राजस्व परिचालन, बजेट खर्चको अवस्था, विद्यार्थी भर्ना र टिकाउ दर, गर्भ जाँच गर्ने महिला अनुपात, एसईई परीक्षा नतिजा, खोप लगाएका बालबालिका अनुपात आदि समावेश छन्।
