नेपाल धितोपत्र बोर्डको अध्यक्ष नियुक्तिविरुद्ध परेको रिटमा सर्वोच्च अदालतले अल्पकालीन आदेशलाई नै निरन्तरता दिएको छ । सर्वोच्च अदालतका न्यायाधीश सपना प्रधान मल्ल र बालकृष्ण ढकालको संयुक्त इजलासले गत असार १८ गते जारी अल्पकालीन अन्तरिम आदेशलाई निरन्तरता दिएको हो ।
गत मंगलबार सर्वोच्च अदालतका न्यायाधीश अब्दुल अजिज मुसलमानको एकल इजलासले धितोपत्र बोर्डको अध्यक्षका एक उम्मेद्वार सन्तोषनारायण श्रेष्ठले दिएको रिटमाथि प्रारम्भिक सुनुवाई गर्दै पुरानो प्रक्रिया रद्द नगर्न सरकार र सम्बद्ध सरोकारवालाको नाममा अल्पकालीन अन्तरिम आदेश दिएका थिए ।
धितोपत्र ऐनअनुसार कम्तीमा तीनजनाको नाम अध्यक्षका लागि सिफारिस गर्नुपर्ने व्यवस्था छ । तर, पहिलो चरणको छनोटमा परेका पाँचजनामध्ये तीनजना कार्ययोजना प्रस्तुति तथा अन्तर्वार्तामा उपस्थित नभएपछि सिफारिस समितिले गत शुक्रबार अध्यक्ष चयन प्रक्रिया रद्द गरेको थियो ।
सरकारले भने अध्यक्ष चयनका लागि फेरि सिफारिस समिति गठन गरिसकेको छ ।
