काठमाडौँ । जुम्ला जिल्लाको तातोपानी गाउँपालिकाले ५० वर्षदेखि ६० वर्षसम्मका एकल पुरुषलाई एकल पुरुष भत्ता कार्यक्रम लागू गर्ने भएको छ।
पालीकाले आगामी आर्थिक वर्ष २०८१र८२ को नीति तथा कार्यक्रम र बजेटमा गाउँपालिकाभित्रका आर्थिक अवस्था कमजोर भएका, कुनै व्यवसायमा नगरेका एकल पुरुषको जीविकोपार्जनका निमिक्त सहज बनाउन भत्ता कार्यक्रम लागू गरिएको जानकारी दिएको छ ।
पालिकाले उक्त उमेर समुहका एकल पुरुषलाई वार्षिक रु चार हजारका दरले भत्ता दिने कार्यक्रम नीति तथा कार्यक्रममा समावेश गरेको सोही पालीका अध्यक्ष नन्दप्रसाद चौलागाईंले जानकारी दिएका छन् ।
सरकारले प्रदान गर्ने सामाजिक सुरक्षा भत्ताबाट लाभान्वित पुरुष बाहेक अन्य एकल पुरुषका लागि गरिएको उक्त कार्यक्रममा रु चार लाख बजेट विनियोजन गरिएको चौलागाईंको भनाई छ ।
किसानलाई व्यावसायिक पशु पालनतर्फ आकर्षित गर्न कम्तीमा एक सय भन्दा बढी भेडा बाख्रा पाल्नेलाई प्रोत्साहन भत्ता वितरण गर्नका लागि दुई लाख बजेट विनियोजन गरिएको अध्यक्ष चौलागाईंको भनाई छ ।
साथै गाउँपालिकाका पालिकाभित्रबाट एमबिबिएस अध्ययनका लागि प्रवेश परीक्षा उत्तीर्ण गर्नेमध्ये एकजनालाई पहिलो वर्षको पढाइ खर्चबापत १५ लाख दिने गरी रकम विनियोजन गरेको र जेहेनदार तथा विपन्न विद्यार्थीलाई निःशुल्क लोकसेवा तयारी कक्षा सञ्चालन गर्न १५ लाख बजेट विनियोजन गरिएको चौलागाईंले जानकारी दिएका छन् ।
