काठमाडौँ । स्रोत नखुलेको ठूलो रकमसहित दुई जना पक्राउ परेका छन्। काठमाडौँ महानगरपालिका–२६ क्षेत्रबाट १९ लाख ९४ हजार रुपैयाँसहित स्याङ्जा वालिङ नगरपालिका–६ घर भई हाल बानेश्वर बस्दै आएका ४१ वर्षीय ईश्वर थापा आइतबार राति पक्राउ परेका हुन्। दरबारमार्ग प्रहरीको टोलीले केशरमहलतर्फ जाँदै गरेको स्कुटर जाँच गर्ने क्रममा उनलाई नगदसहित नियन्त्रणमा लिएको हो।
यसैगरी, कमलादीस्थित गणेश मन्दिर नजिकबाट ४ लाख ८ हजार रुपैयाँसहित कपन बस्ने ४२ वर्षीय सुदर्शन खड्का पनि पक्राउ परेका छन्।
मालीगाउँ प्रहरीको टोलीले उनलाई मोटरसाइकलसहित नियन्त्रणमा लिएको जनाएको छ।
दुवै घटनामा प्रहरीले थप अनुसन्धान जारी राखेको छ।
