काठमाडौं । नेपाल चेम्बर अफ कमर्सका निवर्तमान अध्यक्ष राजेन्द्र मल्लले नेपाल र जापानबीच सात दशकदेखि कायम रहेको मैत्रीपूर्ण सम्बन्धलाई अब व्यापार, लगानी, प्रविधि, पर्यटन तथा नवप्रवर्तनका क्षेत्रमा थप सुदृढ बनाउनुपर्ने बताएका छन्।
नेपाल–जापान कूटनीतिक सम्बन्ध स्थापना भएको ७०औँ वर्षगाँठ (१९५६–२०२६) को अवसरमा नेपाल चेम्बर अफ कमर्स र नेपाल एओटिएस एलुम्नाइ सोसाइटीद्वारा संयुक्त रूपमा आयोजित नेपाल्र जापान व्यापार गोष्ठी तथा छलफल कार्यक्रममा मन्तव्य व्यक्त गर्ने क्रममा सो धारणा राखेका हुन । उनले सन् १९५६ सेप्टेम्बर १ मा कूटनीतिक सम्बन्ध स्थापना भएयता दुई देशबीचको सम्बन्ध आपसी विश्वास, सम्मान, साझा मूल्य र जनस्तरको आत्मीय सम्बन्धमा आधारित रहेको बताए।
उनले जापान नेपालका सबैभन्दा विश्वासिला विकास साझेदारमध्ये एक रहेको उल्लेख गर्दै पूर्वाधार विकास, शिक्षा, स्वास्थ्य, कृषि, विपद् जोखिम न्यूनीकरण, जलविद्युत् तथा मानव स्रोत विकासका क्षेत्रमा जापानले पुर्याएको योगदानले नेपालको आर्थिक तथा सामाजिक विकासमा महत्वपूर्ण भूमिका खेलेको बताए।
मल्लले नेपाल-जापान सम्बन्धमा व्यापार र लगानी पनि महत्वपूर्ण आधार बनेको उल्लेख गर्दै नेपालबाट जापानमा पश्मिना, हस्तनिर्मित गलैंचा, हस्तकलाका सामग्री, चिया, कफी, कागजनिर्मित सामग्री, तयारी पोशाक, छालाजन्य वस्तु तथा चाँदीका गरगहना निर्यात भइरहेको उल्लेख गरे। जापानबाट भने अत्याधुनिक मेसिनरी, सवारीसाधन, विद्युतीय उपकरण, स्वास्थ्य सामग्री तथा औद्योगिक प्रविधि आयात हुँदै आएको उनले बताए।
उनले जापानी लगानीले नेपालमा आधुनिक प्रविधि, गुणस्तरीय उत्पादन प्रणाली, रोजगारी सिर्जना तथा सीप हस्तान्तरणमा महत्वपूर्ण योगदान पुर्याएको जनाए ।
मल्लले आगामी दिनमा जलविद्युत्, नवीकरणीय ऊर्जा, कृषि, पर्यटन, सूचना प्रविधि, कृत्रिम बौद्धिकता (एआई), डिजिटल पूर्वाधार, डाटा सेन्टर, उत्पादनमूलक उद्योग, स्वास्थ्य, शिक्षा तथा दिगो पूर्वाधार निर्माणका क्षेत्रमा जापानी लगानीका लागि नेपालमा पर्याप्त सम्भावना रहेको बताए।
नेपालले नीतिगत स्थायित्व, पारदर्शिता तथा व्यवसायमैत्री वातावरण निर्माण गर्दै लगानीको सहजता बढाउँदै गएको उल्लेख गर्दै उनले नेपालमा थप जापानी लगानी तथा निजी क्षेत्रबीचको सहकार्य विस्तारका लागि आह्वान गरे।
नेपाल-जापान कूटनीतिक सम्बन्धको ७०औँ वर्षगाँठले दुई देशबीच व्यापार, लगानी, प्रविधि, पर्यटन, सांस्कृतिक आदान-प्रदान तथा नवप्रवर्तनका क्षेत्रमा सहकार्यलाई अझ सुदृढ बनाउने विश्वास व्यक्त गर्दै मल्लले जापानबाट आएका विशिष्ट अतिथि तथा व्यवसायिक प्रतिनिधिमण्डलको सफल नेपाल भ्रमणको शुभकामना व्यक्त गरे।
