काठमाडौं । नेपाल माइक्रो इन्स्योरेन्सका निलम्बित प्रमुख कार्यकारी अधिकृत मृगेन्द्रनाथ रिमाल २५ लाख रुपैयाँ धरौटीमा रिहा भएका छन् ।
गत साउन ७ गते पक्राउ परेका रिमाललाई प्रहरीले आज विशेष अदालतमा थुनछेक बहसका लागि पेश गरेको थियो । अदालतका अनुसार २५ लाख रुपैयाँ धरौटी राखेर तारेखमा बसेर मुद्दाको पुर्पक्ष गर्न पाउने गरी उनलाई रिहा गरिएको हो ।
विशेष अदालतमा दर्ता भएको मुद्दा नं ०८२-CR-०१४५ मा इजलासले धरौटी मागेपछि रिमालका परिवारले नगद धरौटी बुझाएर उनलाई घर लगेका छन् ।
नेपाल प्रहरीको केन्द्रीय अनुसन्धान ब्युरोले काठमाडौं महानगरपालिका–७ सिफलबाट उनलाई पक्राउ गरेको थियो । रिमालविरुद्ध सम्पत्ति शुद्धिकरणसम्बन्धी मुद्दा चलाइएको छ ।
मंगलबार भएको थुनछेक बहसपछि न्यायाधीश नारायणप्रसाद पौडेल, हेमन्त रावल र उमेश कोइरालाको संयुक्त इजलासले धरौटीमा छाड्ने आदेश दिएको हो ।
यस प्रकरणमा रिमालले प्रयोग गरेको २५ लाख रुपैयाँको स्रोतबारे थप अनुसन्धान हुने सम्भावना रहेको जनाइएको छ ।
