काठमाडौँ । चितवनमा जंगली जनावरबाट बाली जोगाउन थापेको विद्युतीय पासोमा परेर एकजनाले ज्यान गुमाएका छन् । चितवनको माडी नगरपालिका-३ धोबहामा स्थानीय कृषक शिवनारायण महतोले जंगली जनावरबाट बाली जोगाउन थापेको विद्युतीय पासोमा परेर उनकै छोरा २६ वर्षीय धिरन महतोले ज्यान गुमाएका हुन् ।
बुवाले थापेको विद्युतीय पासोबाट करेन्ट लागेर घाइते भएपछि उनलाई शनिबार बघौडा अस्पताल माडीमा उपचारका लागि भर्ना गरिएको थियो । त्यहाँ सामान्य उपचारपछि उनलाई थप उपचारका लागि भरतपुरतर्फ पठाइएको थियो ।
उनलाई भरतपुर अस्पतालमा पुर्याएपछि चिकित्सकहरुले मृत घोषणा गरेका थिए ।
