काठमाडौँ । कलंकी ट्रेड सेन्टरका व्यापारिक सटर उपलब्ध बनाउने भन्दै विभिन्न व्यक्तिबाट १३ करोड रुपैयाँ भन्दा बढी रकम ठगी गर्ने सोही सेन्टरका ६ जना सञ्चालकलाई पक्राउ परेका छन् ।
जिल्ला प्रहरी परिसर काठमाडौँको टोलीले कलंकीस्थित ट्रेड सेन्टरका व्यापारिक सटर हस्तान्तरण गर्ने भनी १३ करोड ७३ लाख ५२ हजार २ सय ५६ रुपैयाँ ठगी गरेको आरोपमा ६ जना सञ्चालकलाई पक्राउ गरी सार्वजनिक गरेको छ ।
पक्राउ पर्नेमा स्याङ्जाका ६१ वर्षीय शान्तिरमण पंगेनी,काठमाडौँका ६८ वर्षीय नरेन्द्र बज्राचार्य, ५१ वर्षीय राजु महर्जन, ललितपुरका ६२ वर्षीय राजेशकृष्ण श्रेष्ठ, पाल्पाका ५३ वर्षीय निरञ्जनकुमार श्रेष्ठ र कास्कीका ५९ वर्षीय चिरञ्जीवी पौडेल रहेको प्रहरीको भनाइ छ। नरेन्द्र बज्राचार्य प्राइम कमर्सियल बैंकका सञ्चालक समेत हुन ।
जिल्ला प्रहरी परिसर काठमाडौँका प्रवक्ता, प्रहरी उपरीक्षक नवराज अधिकारीले कलंकी डेभलपर्स र मिला ल्याण्ड डेभलपमेन्ट प्रालिमार्फत कलंकी ट्रेड सेन्टर निर्माण गरी व्यापारिक सटर हस्तान्तरण गर्ने भनी ठगी गरेकाले उनीहरूलाई पक्राउ गरिएको जानकारी दिए।
