काठमाडौं। सरकारले पूर्वप्रधानमन्त्री शेरबहादुर देउवाका छोरा जयवीर देउवामाथि सम्पत्ति शुद्धीकरणसम्बन्धी कसुरमा अनुसन्धान गरिरहेको छ। सम्पत्ति शुद्धीकरण अनुसन्धान विभागले मंगलबार सूचना जारी गर्दै सात दिनभित्र विभागमा उपस्थित हुन निर्देशन दिएको हो।
विभागले उनलाई सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा ७१ बमोजिम सात दिनभित्र विभागको केन्द्रीय कार्यालय, पुल्चोक, ललितपुरमा उपस्थित हुन भनेको छ। अनुसन्धानको सिलसिलामा बयान लिन आवश्यक भएकाले बोलाइएको सूचनामा उल्लेख छ।
जयवीर देउवा लामो समयदेखि नेपालबाहिर छन्। कांग्रेसका पूर्व सभापति तथा पूर्वप्रधानमन्त्री शेरबहादुर देउवा र आरजु राणा देउवा पनि सिंगापुरहुँदै गत फागुनदेखि हङकङमा छन्।
विवादास्पद व्यवसायी दीपक भट्टसँग देखिएको व्यावसायिक सम्बन्धलाई लिएर जयवीर सरकारी अनुसन्धानमा तानिएका हुन्। पक्राउ परेका भट्ट र उनका साझेदार सुलभ अग्रवाल पुर्पक्षका लागि थुनामा छन्। भट्टको व्यावसायिक कारोबार छानबिन गर्दै जाँदा जयवीर जोडिएको विभागले भेटेको हो।
सरकारी स्रोतका अनुसार विभिन्न व्यावसायिक कारोबार र लगानीसम्बन्धी विषयमा जयवीर र भट्टबीच सहकार्य रहेको विवरण अनुसन्धानको दायरामा परेको छ। सोही क्रममा वित्तीय कारोबार, लगानीको स्रोत तथा सम्पत्तिको वैधतासम्बन्धी पक्षमा विभागले अध्ययन गरिरहेको छ।
