हेटौंडा । बागमती प्रदेशका मुख्यमन्त्री इन्द्रबहादुर बानियाँले सोमबार पदबाट राजीनामा दिएका छन्। प्रदेशसभा बैठकमा विश्वासको मत लिने प्रस्तावमाथि सम्बोधन गर्दै उनले मुख्यमन्त्री पदबाट राजीनामा घोषणा गरेका हुन्।
राजीनामा घोषणा गर्नुअघि बानियाँले आफ्नो करिब एक वर्षे कार्यकालमा प्रदेश सरकारले गरेका प्रमुख काम तथा उपलब्धिबारे प्रदेशसभामा जानकारी गराएका थिए। उनले सरकारका कामको प्रगति २८ बुँदामा प्रस्तुत गरेका थिए।
नेकपा एमालेले गत ६ साउनमा प्रदेश सरकारलाई दिएको समर्थन फिर्ता लिएपछि मुख्यमन्त्री बानियाँले संवैधानिक व्यवस्थाअनुसार ३० दिनभित्र प्रदेशसभाबाट विश्वासको मत लिनुपर्ने अवस्था आएको थियो।
सोहीअनुसार सोमबार प्रदेशसभाबाट विश्वासको मत लिने तयारी गरेका बानियाँले मतदान प्रक्रियामा जानुअघि नै राजीनामा घोषणा गरेका हुन्।
