काठमाडौँ । यस वर्षको तिहारमा ५० करोड रुपैयाँ बढीको फूलको कारोबार भएको छ । फ्लोरिकल्चर एशोसिएसनका अनुसार सबैभन्दा धेरै खपत हुनेमा काठमाडौँ उपत्यकामा रहेको जानकारी दिएको छ ।
गत वर्षकै हाराहारीमा यस वर्ष फूलको कारोबार भएको छ । यस वर्ष उपभोक्ताले सामान्यतया एउटा मालाको २ सय देखि ५ सय रुपैयाँसम्म तिर्नुपरेको थियो।
विशेषगरी तिहारमा प्रयोग हुने मखमली र गोदावरी फूल स्वदेशी उत्पादनले नै पुग्ने गरेको भए पनि सयपत्री र रातो गुलाफ भने भारतबाट आयात गर्नुपर्ने बाध्यता अझै कायम रहेको फ्लोरिकल्चर एशोसिएसनका अध्यक्ष दिलीप बादेले जानकारी दिएका छन्।
व्यावसायिक रूपमा चार सय ५० प्रजातिका फूल उत्पादन हुँदै आएका अध्यक्ष बादेको भनाई छ । पुष्प खेतीबाट ४४ हजारभन्दा बढी लाभान्वित भएका छन् । दुई सय २१ हेक्टरमा एक हजार एक सय ८४ व्यवसायीले पुष्पखेती हुदै आएको उनको भनाई छ।
काठमाडौँ उपत्यकाको तीन जिल्लासहित कास्की, चितवन, मकवानपुर, काभ्रेपलान्चोक, गुल्मी, पाल्पा, धादिङ, मोरङलगायत ५२ वटा जिल्लामा पुष्पखेती विस्तार भएका छन् ।
