काठमाडौँ । यस साता सुनको मूल्यमा नयाँ रेकर्ड कायम भएको छ। साताको पहिलो दिन, आइतबार रेकर्ड कायम भएको सुनको मूल्य दोस्रो दिन सोमबार फेरि ऐतिहासिक रेकर्ड कायम भएको थियो।
आइतबार उच्च रेकर्ड राख्दै सुन प्रतितोला एक लाख ५६ हजार ८०० रुपैयाँ रहेको सुनको मूल्य सोमबार फेरि अर्को उच्च ऐतिहासिक रेकर्ड राख्दै एक लाख ५७ हजार ३०० रुपैयाँको उच्चस्तरमा पुगेको थियो ।
तर, त्यसपछि भने सुनको मूल्यमा सामान्य गिरावट आएको हो ।
साताको अन्तिम दिन, सुन प्रतितोला एक लाख ५७ हजार १०० रुपैयाँ कायम भएको थियो। यो मूल्य साताको पहिलो दिनको तुलनामा प्रतितोला ३०० रुपैयाँले बढी हो।
यसैगरी, यो साता नेपाली बजारमा चाँदीको मूल्य पनि वृद्धि भएको छ । आइतबार चाँदी प्रतितोला एक हजार ९०० रुपैयाँमा तोकिएको थियो । साताको पछिल्लो कारोबार शुक्रवार भने बढेर एक हजार ९१५ रुपैयाँमा कारोबार भयो । यसरी, साताभरमा चाँदी १५ रुपैयाँले महँगिएको हो ।
