काठमाडौं । भारत सरकारले सवारीसाधनमा शतप्रतिशत इथानोल इन्धन प्रयोग गर्न कानुनी आधार तयार पारेको छ। सडक यातायात तथा राजमार्गमन्त्री नितीन गडकरीले इथानोल–आधारित सवारी सञ्चालनसम्बन्धी नियमावलीलाई अन्तिम स्वीकृति दिइसकिएको जानकारी दिएका छन्।
नागपुरमा आयोजित पत्रकार सम्मेलनमा मन्त्री गडकरीले जीवाश्म इन्धनमा निर्भरता घटाउने र वातावरणीय प्रदूषण कम गर्ने लक्ष्यसहित यो कदम अघि बढाइएको बताए। उनका अनुसार अब भारतमा वैकल्पिक इन्धनको प्रयोगलाई तीव्र विस्तार गरिनेछ।
सरकारी योजनाअनुसार प्रमुख अटोमोबाइल कम्पनीहरू टोयोटा, सुजुकी र हुन्डाईले १०० प्रतिशत इथानोलमा चल्ने सवारीसाधन उत्पादनको तयारी पूरा गरिसकेका छन्। यी मोडलहरू आगामी केही हप्तादेखि दुई महिनाभित्र बजारमा आउने अपेक्षा गरिएको छ।
भारत हाल ठूलो मात्रामा कच्चा तेल आयातमा निर्भर रहेको छ। इथानोलको व्यापक प्रयोगले पेट्रोल–डिजेलको खपत घटाउने, आयात खर्च कम गर्ने तथा घरेलु कृषि उत्पादनको उपयोग बढाउने विश्वास सरकारको छ।
इथानोल जैविक स्रोतबाट उत्पादन हुने अल्कोहल हो, जुन उखु, मकै, आलु र अन्य कृषि उत्पादनबाट तयार गरिन्छ। यसलाई विशेष रूपमा डिजाइन गरिएका फ्लेक्स–फ्युल इन्जिनमा शुद्ध वा मिश्रित रूपमा प्रयोग गर्न सकिन्छ। सामान्य पेट्रोल इन्जिनमा भने १०० प्रतिशत इथानोल प्रयोग सम्भव हुँदैन।
