काठमाडौं । बबरमहल क्षेत्रमा मेलम्ची खानेपानी आयोजनाको पाइप फुटेपछि सडक भासिएको छ । पानीका कारण बाढीकै अवस्था बनेपछि उक्त क्षेत्रमा सवारी आवागमन प्रभावित भएको छ ।
पाइप फुटेर निस्किएको पानीका कारण जिल्ला अदालत काठमाडौं अगाडिको सडक तथा वन परिसरभित्र रहेका सरकारी कार्यालयहरू जलमग्न भएका छन् ।
मेलम्ची खानेपानी परियोजना कार्यान्वयन इकाई विद्युत् प्राधिकरणले बिजुलीको तार भूमिगत गर्ने क्रममा ड्रिलिङ गर्दा मेलम्चीको पाइप क्षतिग्रस्त भएको दाबी गरेको छ ।
बबरमहलस्थित विशेष अदालत र काठमाडौं जिल्ला अदालतको दोस्रो भवन जलमग्न भएको छ। पानी पसेपछि मुद्दा सुनुवाइ ठप्प भएको छ भने सेवाग्राही, कानून व्यवसायी र कर्मचारीहरू समस्यामा परेका छन्।
पानी बगेर अदालत परिसरमा बाढी जस्तै अवस्था सिर्जना भएको छ। भुइँतला डुबानमा परेको छ भने बिजुली समेत अवरुद्ध छ।
न्यायाधीश, कर्मचारी तथा सेवाग्राही बाहिर निस्कन नसक्ने अवस्था नभएपछि सुरक्षाकर्मीहरूले उद्धार कार्य अघि बढाएका छन्।
