काठमाडौं। त्रिभुवन अन्तर्राष्ट्रिय विमानस्थलमा सेटिङ मिलाएर भिजिट भिसामा नेपालीलाई विभिन्न देशमा पठाएको आरोपमा अध्यागमन अधिकृतसहित चार जनालाई पुर्पक्षका लागि थुनामा पठाउन जिल्ला अदालत काठमाडौँले आदेश दिएको छ।
न्यायाधीश कपिलमणि गौतमको एकल इजलासले आज अधिकृत नरवीर खड्का, अरुण दाहाल, सरोजकुमार यादव र मनोज तामाङलाई पुर्पक्षका लागि थुनामा पठाउने आदेश दिएको जनाएको छ । उक्त प्रकरणमा अन्य ६ जनासँग भने अदालतले धरौटी माग गरेको छ ।
उक्त प्रकरणमा पक्राउ परेकी गीता शाहसँग पाँच लाख, पदम लामासँग एक लाख, विनोद कार्कीसँग दुई लाख तथा दिनेश ज्ञवाली र रामप्रसाद भण्डारीसँग सात सात लाख र रविन अर्यालसँग एक लाख धरौटी माग गर्ने आदेश दिएको छ।
भिजिट भिसामा युवालाई विदेश पठाउने गिरोहमा संलग्न रहेको आरोपमा नौ अध्यागमन अधिकृतसहित २२ जनाविरुद्ध यही माघ १८ गते सरकारी कागजात किर्ते गरी सङ्गठित अपराध गरेको आरोपमा जिल्ला सरकारी वकिल कार्यालयले फरार रहेका १२ जनासहित २२ जनाविरुद्ध मुद्दा दायर गरेको थियो ।
