काठमाडाैं । नक्कली फेसबूक आईडी बनाएर चरित्र हत्या गरेको आरोपमा प्रशरीले एकजनालाई पक्राउ गरेकाे छ । काठमाडौं उपत्यका अपराध अनुसन्धान कार्यालयको प्रहरी टोलीले नक्कली फेसबूक आईडीमा अश्लील फोटो तथा भिडियो राखी चरित्र हत्या गरेको अभियोगमा भक्तपुर नगरपालिका–१४ बस्ने २५ वर्षीय सुसन चौगुठीलाई पक्राउ गरेकाे हाे ।
कार्यालयका प्रवक्ता तथा प्रहरी उपरीक्षक रवीन्द्र रेग्मीका अनुसार निज चौगुठीले सामाजिक सञ्जाल फेसबूकमा केटी साथीहरुलाई साथी बनाई नजिक भई प्रेमजालमा पारी विभिन्न बहानामा फोटो तथा भिडियो खिच्ने गरेका थिए । उक्त अश्लील फोटो तथा भिडियो नक्कली फेसबूक खाता बनाई सार्वजनिक गर्ने गरेको प्रहरीले जनाएको छ ।
प्रहरीका अनुसार विद्युतीय कारोबार ऐन, २०६३ विपरीतको कार्य गरेको प्रारम्भिक अनुसन्धानबाट खुल्न आएकाले निजलाई पक्राउ गरिएको हो ।
पक्राउ परेका चौगुठीलाई आवश्यक अनुसन्धान एवं कारबाहीका लागि प्रहरी प्रधान कार्यालय, साइबर ब्यूरो भोटाहिटी पठाइएको छ ।
