काठमाडौं । अन्य क्षेत्रमा जोखिम बढीरहेको बेलामा बीमा क्षेत्रमा आवद्ध हुनेहरुको संख्या बढेको देखिन्छ । एकातिर बीमा गराउने बीमितहरुले जोखिम बढ्दा बीमाको महत्व बढेको बताइरहेका छन् भने अर्कोतिर बीमा कम्पनीहरुको आम्दानी पनि उकालो नै लागेको अवस्था छ ।
ठिक यही अवस्थामा अन्य क्षेत्रमा हेर्ने हो भने केही प्रतिकूल अवस्था पनि देख्न सकिन्छ । व्यापार व्यवसायमा सकारात्मक वातावरण छैन, उद्योगीदेखि निर्माण व्यवसायीहरुले खुशीको चेहरा देखाउन सकेका छैनन्, कतिपयले मुख खोलेर हाँस्न सकेका छैनन्, भने कतिपय व्यवसायीहरु वैदेशिक रोजगारीमा पलायन हुन बाध्य छन् ।
नेपालमा यस्तो सिनारियो करिब कोरोना महामारीदेखि चलेकै छ । अझ देशको अर्थतन्त्रले नै विभिन्न किसिमका मन्दीहरुको मार खेप्दा पैसा भएकाहरु पनि झ्याप्पै लगानी गर्न सशंकित छन् । यस्तो अवस्थामा पनि नेपाली बीमा क्षेत्रको खम्बा भने बलियो नै रहेको देखिन्छ । जति धेरै जोखिम बढ्यो त्यति नै धेरै बीमा हुने अनुभव पनि बीमा कम्पनीहरुले पाएका छन् । अहिलेको समयमा केही जीवन बीमा कम्पनीहरु स्वयमले नै आर्थिक भ्वाईससँगको कुराकानीमा अन्य क्षेत्रमा मन्दीले प्रत्यक्ष असर गर्दा पनि बीमा क्षेत्रमा भने त्यस्तो असर नगरेको बताएका हुन् ।
बीमा क्षेत्रका जानकारहरुले नै अहिले सबैभन्दा पहिले जो कोहीले आफूले किन बीमा गर्दैछु भन्ने कुरा थाहाँ पाउन थालेको र उनीहरुले बीमा गरेपछि हुने रक्षावरणलाई ख्याल गर्दै बीमामा जोडिन थालेको बताएका छन् ।
बीमा कम्पनीहरुले पछिल्लो समय बीमितहरुले आफुलाई कुन बीमा आवश्यक छ भन्ने पहिचान गर्दै बीमा कम्पनीसम्म आउन थालेको देख्दा खुशी लाग्ने गरेको जानकारी दिएका हुन् । यस अघि भने विगतमा यस्तो अवस्था निकै कम रहेको कम्पनीहरुसँग अनुभव छ । उनले बीमाको ज्ञान जति धेरै फैलदै गयो त्यति नै धेरै बीमा गराउनेहरुको संख्या वृद्धि हुनेमा दुई मत नरहेको बीमा कम्पनीहरुले स्पष्ट पारेका छन् ।
हाल जीवन बीमा कम्पनीहरुले बीमितलाई दिने बोनसकै कारण पनि ठूलो आकर्षण रहदै आएको पाइन्छ । नेपाल बीमा प्राधिकरण आफैले समेत सातै प्रदेशमा आफन कार्यालय तथा बीमा कम्पनीहरुको समेत कार्यालय बिस्तार गर्ने योजना लिएको छ । सोही योजना अनुरुप बीमाको प्रचार प्रसार ह्वात्तै बढेको पाइन्छ ।
नागरिकहरु बीमामा आकर्षित हुनुको पछाडी बीमा कम्पनीहरुले सबैभन्दा मुख्य कुरा बीमाले दिने सेवा नै रहेको बताउँछन । उनीहरुले त्यस्ता सेवा लिनका लागि समेत नागरिकहरुले बीमा गर्ने बानी बसाल्नु पर्ने बीमा कम्पनीहरुको धारणा छ । उनीहरुले बोनस दरलाई बीमाको क्राइटएरिया जस्तो देखाएको नभई भवितव्य पर्दा व्यक्तीले पाउँने लाभको बारेमा चर्चा गरेको पनि बताउँने गरेका छन् । अहिले बीमा क्षेत्रको नियामक निकाय नेपाल बीमा प्राधिकरणले नै फ्युचर बोनस प्रोभिजन लागु गरेको अवस्था छ । त्यस्तो प्रोभिजनका कारण बीमा कम्पनीहरुले आफ्नो बोनस दर स्थिर बनाउन सक्ने वाताबरण पनि तयार भइसकेको अवस्था छ । यसको मतलब आगामी दिनमा कुनै बीमितले जुनसुकै बीमा कम्पनीमा बीमा गराए पनि उनीहरुले पाउने सुविधा भने न्यूनतम मापदण्डभन्दा तल नजाने बीमा प्राधिकरणले करिब ग्यारेन्टी जस्तै गरेको अवस्था छ ।
बीमा कम्पनीहरुले बीमाका धेरै सबल पक्षहरु रहेको बताउँदै आफ्ना त्यस्तो योजनाहरुको प्रचार प्रसार भने निकै कम रहेको बताएका छन् । उनीहरुले जति धेरै बीमाको प्रचार गर्न सकिन्छ आगामी दिनमा नागरिकहरुको दुखमा पनि बीमाले त्यति नै धेरै साथ दिन सक्ने कम्पनीहरु बताउँछन् ।
अहिले बीमितहरुले २० वर्षकालागि आफ्ना ठूला ठूला जोखिमहरु निर्धक्क जिम्मा लगाउन सक्ने अवस्थाकै कारण नेपालमा बीमाको महत्व दैनिक बढेको र व्यापारको आकार समेत विगतको तुलनामा ग्रोथ रेटमा रहेको बीमा कम्पनीहरुले जानकारी दिएका छन् ।
