काठमाडौँ । पछिल्लो समय एकपछि अर्को सहकारीको समस्या बढिरहेको समयमा आइडियल यमुना हाम्रो बहुउद्देश्यीय सहकारी संस्था लिमिटेडको ८ अर्ब रुपैयाँ हिनामिना भएको पाइएको छ । उक्त सहकारीमा ३० हजारभन्दा बढी बचतकर्ताको ८ अर्ब रुपैयाँ बचत रहेको देखिएको छ ।
समस्याग्रस्त सहकारी व्यवस्थापन समितिको कार्यालयले उक्त सहकारीले ८ अर्ब रुपैयाँ हिनामिना गरेको देखाउँदै बचतकर्ता सदस्य र साहुहरूलाई लिनुपर्ने रकम माग दाबी गर्न आग्रह गरेको छ । समितिले ३० हजारभन्दा बढी बचतकर्तालाई ३५ दिनभित्र अनलाइनमार्फत माग दाबी गर्न भनेको छ।
२०८० असारमा हाम्रो सगरमाथामा आइडियल यमुना बहुउद्देश्यीय सहकारी संस्था, हाम्रो बहुउद्देश्यीय सहकारी संस्था, घेदुङ बहुउद्देश्यीय सहकारी संस्था र नागरिक कल्याण बहुउद्देश्यीय सहकारी संस्था मर्ज गरेर आईडल यमुना हाम्रो बहुउद्देश्यीय सहकारी संस्थाका नाममा कारोबार गर्न सहकारी विभागबाट स्वीकृति लिएका थिए ।
भूमि व्यवस्था, सहकारी तथा गरिबी निवारण मन्त्रालयले आइडियल यमुना सहकारीलाई समस्याग्रस्त घोषणा गरी सम्पत्ति व्यवस्थापन र दायित्व भुक्तानीका लागि समितिलाई लेखी पठाए बमोजिम समितिको कार्यालयले ऋण असुलीका साथै दायित्व भुक्तानीको प्रक्रिया अघि बढाइएको हो ।
