काठमाडौँ। कुमारी बैंक लिमिटेडले चालु आर्थिक वर्षको दोस्रो त्रैमाससम्म आइपुग्दा उल्लेखनीय वित्तीय प्रगति हासिल गरेको छ । बैंकको खुद नाफा तीव्र गतिमा बढ्दै २ अर्ब ७२ करोड रुपैयाँ पुगेको छ, जुन अघिल्लो आर्थिक वर्षको सोही अवधिको तुलनामा ८८६.५० प्रतिशतले बढी हो ।
कुमारी बैंकको नाफा २० वटा वाणिज्य बैंकहरुमध्ये सबैभन्दा तीब्र गतिले बढेको हो।
यसैगरी, बैंकको खुद ब्याज आम्दानी ६ अर्ब ७८ करोड रुपैयाँ पुगेको छ, जुन अघिल्लो वर्षको तुलनामा २७.६५ प्रतिशतले वृद्धि हो । शुल्क तथा कमिशन आम्दानी पनि उल्लेख्य रूपमा बढ्दै १ अर्ब ६० करोड रुपैयाँ पुगेको छ, जुन अघिल्लो आवमा १ अर्ब २७ करोड रुपैयाँ थियो ।
अघिल्लो आवमा ३ अर्ब २७ करोड रुपैयाँ रहेको इम्पेयरमेन्ट चार्ज घटेर हाल १ अर्ब ५० करोड रुपैयाँमा सीमित भएको छ । बैंकको रिटेन्ड अर्निङ २ अर्ब ९८ करोड रुपैयाँले ऋणात्मक रहे पनि रिजर्भमा भने १६ अर्ब ४० करोड रुपैयाँ सञ्चित रहेको छ ।
बैंकले हालसम्म ग्राहकबाट ३ खर्ब ७१ अर्ब रुपैयाँ निक्षेप संकलन गरेको छ भने २ खर्ब ६५ अर्ब रुपैयाँ कर्जा प्रवाह गरेको छ । खराब कर्जा अनुपातमा पनि सुधार देखिएको छ । अघिल्लो आवमा ६.९६ प्रतिशत रहेको खराब कर्जा अनुपात घटेर ६.९२ प्रतिशतमा झरेको छ ।
समीक्षा अवधिसम्म बैंकको वितरणयोग्य मुनाफा २ अर्ब ९८ करोड रुपैयाँले ऋणात्मक अवस्थामा रहेको छ । बैंकको प्रतिसेयर आम्दानी २०.७४ रुपैयाँ, प्रतिसेयर नेटवर्थ १५१.१६ रुपैयाँ, मूल्य–आम्दानी अनुपात ८.६३ गुणा तथा तरलता अनुपात ३६.८३ प्रतिशत कायम भएको छ ।
