ट्रम्पको जीतको प्रभाव: अमेरिकी डलरको मूल्यमा लगातार वृद्धि,नेपाली रुपैयाँ कमजोर बन्दै

काठमाडौँ । अमेरिकी राष्ट्रपतिमा डोनाल्ड ट्रम्पको जीतसँगै विश्व अर्थतन्त्रमा तरङ्ग आएको छ । उनी निर्वाचित भएको पहिरो दिन नै उच्च रेकर्ड बनाएको अमेरिकी डलरको मूल्यले आज दोस्रो दिन पनि उचाइ कायम गरेको छ।

आज डलरको भाउ १४ पैसाले बढेर खरीदमूल्य १३४.७० रुपैयाँ र बिक्री मूल्य १३५.३० रुपैयाँ पुगेको छ ।

पछिल्लो समय डलरको तुलनामा भारतीय रुपैयाँ (भारु) पनि निरन्तर कमजोर बन्दै गएको छ । भारुसँग नेरुको स्थिर विनिमय दर कायम भएकाले भारु कमजोर हुँदा नेपाली रुपैयाँ पनि कमजोर हुने गर्छ । आयातमुखी अर्थतन्त्र भएकाले डलरको भाउ बढ्दा नेपाललाई समग्रमा घाटा बढी पर्छ ।

आयात महँगो पर्छ भने वैदेशिक ऋणको लागत पनि बढ्छ । तर विदेशबाट रेमिटेन्स पठाउनेलाई भने फाइदा हुन्छ । डलर बलियो हुँदा भारु र नेरु दुवै कमजोर बनेका छन् । भारुसँग नेरुको स्थिर विनिमय दर छ ।

नेपाल राष्ट्र बैंकका अनुसार यस दिन एक युरोको खरीदमूल्य १४४.९४ रुपैयाँ र बिक्री मूल्य १४५.५९ रुपैयाँ, एक अष्ट्रेलियन डलरको खरीदमूल्य ८९.३३ रुपैयाँ र बिक्री मूल्य ८९.७२ रुपैयाँ कायम भएको छ ।

त्यसैगरी आज कतारी रियालको बिक्री मूल्य ३७.१२ रुपैयाँ, साउदी अरेबियन रियालको बिक्री मूल्य ३६.०२ रुपैयाँ, यूएई दिरामको बिक्री मूल्य ३६.८४ रुपैयाँ रहेको नेपाल राष्ट्रबैंकले जनाएको छ ।