निजी विद्यालय समेत बन्द गरेर आन्दोलनमा सघाउन महासंघको अनुरोध

काठमाडौं । निरन्तर सडक आन्दोलनमा रहेका शिक्षक महासंघले शैक्षिक हड्ताल भएकाले निजी विद्यालय समेत बन्द गर्न आग्रह गरेको छ । आज विज्ञप्ति निकाल्दै महासंघले निजी विद्यालय सञ्चालकहरूलाई विद्यालय बन्द गर्न अनुरोध गरेको छ ।

‘शैक्षिक आम हड्तालको यो अभियानलाई सफल तुल्याउन संस्थागत विद्यालयहरु समेत बन्द गरी साथ दिन सम्बन्धित सबै मित्रहरुमा अनुरोध छ,’ महासंघले जारी गरेको विज्ञप्तिमा भनिएको छ ।

देशभरका सबै विद्यालय पूर्णरुपमा बन्द गरी काठमाडौं आउन सबै शिक्षक–कर्मचारीलाई महासंघले आग्रह गरेको छ ।

कक्षा १२ को परीक्षामा संलग्न नहुन पनि प्रधानाध्यापक, शिक्षक तथा कर्मचारीलाई महासंघले आग्रह गरेको छ ।