काठमाडौं । अर्थमन्त्री डा. प्रकाशशरण महतले भन्सारका कर्मचारीहरुलाई अवैधानिक काम नहोस् भन्नेमा सतर्क रहन निर्देशन दिएका छन् । अर्थमन्त्री महतले भन्सार विभागले आज आयोजना गरेको भन्सार व्यवस्थापन गोष्ठीलाई सम्बोधन गर्दै भन्सार छली र अवैधानिक काम नहोस् भन्नेमा सतर्क रहन कर्मचारीलाई निर्देशन दिएका हुन् ।
उनले एक अर्कालाई विश्वास गर्दै निगरानी पनि गर्न निर्देशन दिए ।
उच्च मनोबलका साथ काम गर्न भन्सारका कर्मचारीहरुलाई निर्देशन दिँदै मन्त्री महतले भन्सार कार्यालयको स्तरवृद्धि र कर्मचारीहरुको क्षमता वृद्धिका लागि सरकारले पूरा सहयोग गर्ने बताए ।
उनले हरेक कार्यालयलाई एक्सन प्लान बनाएर काम गर्न पनि निर्देशन दिए । साना भन्सार कार्यालयका कर्मचारीहरुलाई आफूलाई सानो नठान्न पनि उनले आग्रह गरे ।
उनले भने, ‘तपाईंहरु गहन जिम्मेवारीमा हुनुहुन्छ । जेजे जिम्मेवारी दिएको छ उच्च सतर्कताका साथ काम गर्नुहोला ।’
