काठमाडौँ । नेपाल बीमा प्राधिकरणले भौतिक रूपमा उपस्थित भई पूर्ण रूपमा कार्यालय सञ्चालन गर्न सबै बीमा कम्पनीलाई निर्देशन दिएको छ। प्राधिकरणले आइतबार एक सूचना जारी गर्दै सम्पूर्ण बीमा कम्पनी र तिनका शाखा कार्यालयहरू पूर्ण रूपमा सञ्चालनमा ल्याउन आग्रह गरेको हो।
देशभर हालैका दिनमा जेनजी आन्दोलनका कारण अधिकांश बीमा कम्पनी बन्द थिए र कर्मचारीहरू घरबाट मात्र काम गर्दै थिए। तर नेपाली सेनाले कर्फ्यु र निषेधाज्ञामा खुकुलोपन ल्याएसँगै सामान्य अवस्था फर्किएको छ।
प्राधिकरणद्वारा जारी विज्ञप्तिमा भनिएको छ, “देशमा विगत केही दिनदेखि सिर्जित विषम परिस्थिति सामान्य बन्दै गइरहेको र सुरक्षा निकायहरूले कर्फ्यु तथा निषेधाज्ञालाई खुकुलो पार्दै लगेको हुनाले सम्पूर्ण बीमा कम्पनी र तिनका शाखा कार्यालयहरू आइतबारदेखि पूर्णरूपमा सञ्चालन गर्न र कर्मचारीहरूले भौतिक रूपमा उपस्थित भई कार्य गर्न अनुरोध गरिन्छ।”
प्राधिकरणको निर्देशनसँगै अब बीमा सेवाहरू पुनः नियमित रूपमा सञ्चालनमा फर्कने अपेक्षा गरिएको छ।
