काठमाडौं । चालु आर्थिक वर्षको १० महिनामा वाणिज्य बैंकहरूले ४७ अर्ब ७९ करोड ४७ लाख रुपैयाँ खुद नाफा कमाएका छन् । यो गत वर्षको यसै अवधिको तुलनामा १.६७ प्रतिशत कम हो । गत वर्षको वैशाखसम्म बैंकहरूले ४८ अर्ब ६० करोड ६७ लाख रुपैयाँ नाफा कमाएका थिए ।
चालु आवको पहिलो दश महिनामा सबैभन्दा धेरै नाफा नबिल बैंकले आर्जन गरेको छ । नबिलले ५ अर्ब ६० करोड रुपैयाँ नाफा कमाएको छ । त्यसपछि ग्लोबल आइएमई बैंकले ५ अर्ब ३५ करोड रुपैयाँ र नेपाल इन्भेष्टमेन्ट मेगाले ५ अर्ब २ करोड रुपैयाँ नाफा कमाउन सफल भएका छन् । सबैभन्दा कम नाफा एनआइसी एशिया बैंकले आर्जन गरेको छ । एनआइसी एशियाले ४ करोड ७८ लाख रुपैयाँ खुद नाफा कमाएको छ ।
बैंकहरूको खराब कर्जामा देखिएको वृद्धिका कारण नाफामा दबाब कायम रहेको हो । केही बैंकहरूको इम्पेयरमेन्ट चार्ज अत्यधिक बढेको छ । एनपीएल पनि उच्च अंकमा पुगेको छ । आम्दानीको ठूलो रकम प्रोभिजनका लागि छुट्याउनु पर्ने हुँदा नाफामा दबाब सृजना भएको हो । जसले समग्र बैंकहरूको वित्तीय सूचकलाई प्रभावित पारेको छ ।
