काठमाडौँ। हेर्ने कथाबाट चर्चामा रहेको भोजपुरका प्रकाश तामाङले नागरिकताको प्रमाणपत्र पाएका छन् ।
परिवारबाट ३५ वर्ष बढी हराएका प्रकाशलाई षडानन्द नगरपालिका- १० स्थित प्रकाशको घरमै पुगेर दिङ्ला इलाका प्रशासन कार्यालयका प्रमुख प्रशासकीय विनोद ज्ञवालीले नागरिकताको प्रमाणपत्र दिएका हुन् ।
प्रकाशको नागरिकता बनाउन षडानन्द नगरपालिका मेयर सुरेन्द्र उदास, नगरपालिकाका कार्यकारी अधिकृत मोहन चापागाईं र वडाध्यक्ष प्रेम दोजी शेर्पाले समन्वय गरेका थिए। प्रकाशको नागरिकताबारे प्रधानमन्त्री केपी शर्मा ओलीले नै चासो दिएका थिए।
प्रधानमन्त्रीकै चासो हुँदा वडाध्यक्ष, मेयर र दिङ्ला इलाका प्रशासन कार्यालयको समन्वयमा घरमै प्रकाशले नागरिकताको प्रमाणपत्र पाएका हुन् । ‘हेर्ने कथा’ कार्यक्रममार्फत प्रकाश साढे तीन दशक पछि परिवारको सम्पर्कमा पुगेका थिए ।नागरिकता बनेसँगै प्रकाशले काठमाडौँमा पुगेर प्रधानमन्त्री भेट्ने कार्यक्रम रहेको छ । उनलाई देश विदेशबाट सहयोग जुटिरहेको छ ।
