काठमाडौँ। भारत सरकारले नेपालका विभिन्न पाँच जलविद्युत् आयोजनाबाट उत्पादित थप २०० मेगावाट बिजुली खरिद गर्नमा सहमति भएको छ । यो सँगै भारतले नेपालबाट खरिद गर्ने कुल बिजुलीको मात्रा ८१०.९ मेगावाटबाट बढेर १ हजार १०.९ मेगावाट पुगेको छ।
विद्युत् प्राधिकरणका अनुसार भारतले ४८.५ मेगावाटको मेवा खोला र ३१.०४ मेगावाट क्षमताको करुवा सेती हाइड्रो पावरबाट उत्पादित बिजुली किन्न सहमति प्रदान गरेको हो ।
पछिल्लो पटक श्रावण २६ गते भारत सरकारले २०० मेगावाट खरिदका लागि अनुमति प्रदान गरेकोमा भाद्र ५ गते थप ८० मेगावाटका लागि अनुमति प्रदान गरेको हो । वाइल्याटरल सम्झौता अन्तर्गत मध्यम अवधिका लागि प्राप्त अनुमति २१ अगस्ट २०२५ देखि ३१ अक्टोबर २०२६ सम्मको लागि कायम रहनेछ ।
यसअनुसार, अब लिखु–२, लिखु खोला ए, लोअर सोलु, ठूलो खोला र सुपर काबेली खोलाबाट उत्पादित बिजुली भारत निर्यात हुनेछ। बङ्गलादेशमा निर्यात भइरहेको ४० मेगावाट बिजुली समेत जोड्दा नेपालको कुल बिजुली निर्यात स्वीकृति १ हजार ५०.९ मेगावाट पुगेको नेपाल विद्युत् प्राधिकरणले जनाएको छ।
गत आर्थिक वर्ष २०८१/८२ मा नेपालले १७ अर्ब ४७ करोड रुपैयाँ बराबरको बिजुली निर्यात गरेको थियो। पछिल्लो निर्यात अनुमतिसँगै यस आर्थिक वर्षमा बिजुली निर्यात दोब्बर हुने अनुमान गरिएको छ।
