काठमाडौं। भोटेकोशीमा आएको विनाशकारी बाढीपछि प्रभावित भएको अपर त्रिशूली–३ए जलविद्युत् आयोजनामा रोकिएका कर्मचारीहरूको उद्धारका लागि नेपाली सेनाको हेलिकप्टर बिहीबार सफलतापूर्वक अवतरण गरेको छ ।
प्रतिकूल मौसमका कारण बुधबार दुई पटकको प्रयास असफल भएपछि आज हेलिकप्टर आयोजनास्थलमा पुग्न सफल भएको हो । हेलिकप्टर अवतरणसँगै आयोजनाको वास्तविक क्षतिको स्थलगत मूल्याङ्कन सुरु भएको छ । उद्धार, क्षतिको आकलन र विद्युत् सेवा पुनस्र्थापनाको कामलाई तीव्र बनाउन नेपाल विद्युत् प्राधिकरणको उच्चस्तरीय टोली पनि प्रभावित क्षेत्रमा परिचालित भएको छ ।
ऊर्जा, जलस्रोत तथा सिँचाइमन्त्री विराजभक्त श्रेष्ठले उद्धार तथा विद्युत् सेवा यथाशीघ्र पुनस्र्थापना गर्न आवश्यक सबै उपाय अपनाउन निर्देशन दिएका छन् । त्यसपछि प्राधिकरणका निमित्त कार्यकारी निर्देशक दीर्घायुकुमार श्रेष्ठ नेतृत्वको टोली बिहीबार बिहानैदेखि फिल्डमा खटिएको छ ।
टोलीमा उपकार्यकारी निर्देशक किरणकुमार श्रेष्ठ, वितरण तथा ग्राहक सेवा निर्देशनालयका प्रमुख तथा प्रवक्ता राजन ढकाल र एनईए इन्जिनियरिङ कम्पनीका प्रमुख कार्यकारी अधिकृत चिरन्तन विक्रम राणा सहभागी छन् । टोलीले प्रभावित क्षेत्रको वस्तुस्थिति अध्ययन, उद्धार समन्वय र विद्युत् पुनस्र्थापनाको प्रगति अनुगमन गरिरहेको प्राधिकरणले जनाएको छ ।
बाढीका कारण प्रसारण तथा वितरण संरचनामा क्षति पुगेपछि वैकल्पिक माध्यमबाट विद्युत् आपूर्ति सुचारु गर्ने काम पनि अघि बढाइएको छ । प्राधिकरणका अनुसार सिन्धुपाल्चोकबाट जोडिएको वैकल्पिक लाइनमार्फत नुवाकोटका खरानीटार, समुन्द्रटार, चौगाडा, लिखु र पञ्चकन्या क्षेत्रमा विद्युत् सेवा पुनः सञ्चालनमा ल्याइएको छ ।
नुवाकोटका अन्य प्रभावित क्षेत्रमा गरिएको स्थलगत निरीक्षणका क्रममा ६६ केभी प्रसारण लाइनलाई ११ केभीमा चार्ज गरेर विद्युत् आपूर्ति सञ्चालन गर्न सकिने सम्भावना देखिएको प्राधिकरणले जनाएको छ ।
त्यसअनुसार चपली–देवीघाट र बालाजु–त्रिशूली ६६ केभी लाइनलाई ११ केभीमा सञ्चालनमा ल्याउने तयारी तीव्र पारिएको छ । प्राधिकरणले उपलब्ध सबै वैकल्पिक प्राविधिक उपाय परिचालन गरी प्रभावित क्षेत्रमा यथाशीघ्र विद्युत् सेवा पुनस्र्थापना गर्ने प्रयास जारी रहेको जनाएको छ ।
