काठमाडौं । नेपाली कांग्रेसका नेता भुपेन्द्रजंग शाहीले सभापति गगन थापाले मंगलबार झापामा आयोजित एक कार्यक्रममा दिएको अभिव्यक्तिप्रति आपत्ति प्रकट गरेका छन् ।
थापाले क्रियाशील सदस्यता अद्यावधिक नगर्नेहरूलाई पार्टीले सदस्यका रूपमा नचिन्ने बताएका थिए । सोही विषयलाई लिएर नेता शाहीले लोकतान्त्रिक पार्टीमा फरक बिचारलाइ निषेध र लोकतान्त्रिक मूल्य मान्यताको उपहास भएको बताएका हुन् ।
शाहीले पार्टीमा देखिएको एकलौटी र निरंकुश निर्णय, अलोकतान्त्रिक चरित्र, अद्यावधिकको नाममा पहिल्यै नवीकरण गरिसकेका सदस्यतालाई खारेज गर्ने र पार्टीमा हिजो जीवन समर्पण गरेका व्यक्तिहरूलाई निकालेर पार्टी कब्जा गर्ने जस्ता गम्भीर समस्या उत्पन्न गराउनुले देशभरिका शुभचिन्तक र समर्थकहरुलाइ स्तब्ध र दुखित तुल्याएको बताएका छन् ।
शाहीले भने,‘ गगन थापाजीले झापामा भाषण गर्दै क्रियाशील सदस्यता पहिला नै नवीकरण गरिसकेका तर अहिले पुनः दबाबमा अद्यावधिक नगरेका हजारौ साथीहरू कोही पनि कांग्रेस पार्टीको सदस्य नरहेको घोषणा गर्नु भएछ । अद्यावधिक नगरेका साथीहरूको नाम अब वडा अधिवेशनका क्रममा आउँदैन, सिस्टमले नै चिन्दैन । त्यसैले अद्यावधिक नभएका सदस्यको नाम वडा अधिवेशनदेखि माथिल्लो तहका निर्वाचन प्रक्रियामा समावेश नहुने र १५औं महाधिवेशनमा भाग लिन नपाउने प्रतिबन्ध लगाउनु भएछ।
अहिले पार्टीमा हालिमुहाली र चुरिफुरि भएका भन्दा अझै बढी नेपाली कांग्रेसमा योगदान गरेका, लामो समय आफ्नो उर्जा र जीवन समर्पण गरेका, रगत र पसिना बगाएका तमाम पार्टीका नेता कार्यकर्ताहरुको सदस्यता खारेज गर्नु भनेको लोकतान्त्रिक पार्टीमा फरक बिचारलाइ निषेध र लोकतान्त्रिक मूल्य मान्यताको उपहास हो,’ उनले अगाडि भने,‘अहिले पार्टीमा देखिएको एकलौटी र निरंकुश निर्णय, अलोकतान्त्रिक चरित्र, अद्यावधिकको नाममा हामीले पहिल्यै नवीकरण गरिसकेका सदस्यतालाई खारेज गर्ने र पार्टीमा हिजो जीवन समर्पण गरेका व्यक्तिहरूलाई निकालेर पार्टी कब्जा गर्ने जस्ता गम्भीर समस्या उत्पन्न गराउनुले देसभरिका शुभचिन्तक र समर्थकहरुलाइ स्तब्ध र दुखित तुल्याएको छ ।’
‘पार्टी कसैको पेवा, व्यक्तिगत सम्पत्ति र बपौती होइन। कसैको धम्की, लहड र मनपरीतन्त्रबाट पार्टी चल्दैन। हामी कसैको दास र लास बन्ने होइन। आफ्नो स्वविवेक, विचार र अधिकारसहित बोल्न, लड्न र फरक विचार राख्न आउनु हाम्रो लोकतान्त्रिक अधिकार हो,’ शाहीले भने ।
पार्टीमा दबाबमा परेर सदस्यता अद्यावधिक नगरेका कारण कांग्रेस पार्टीको सदस्यता खारेजीमा पर्नु भएका, अन्यायमा परेका, पेलिएका, हेपिएका र निराश बन्नुभएका साथीहरूलाई आफूलाई फोन गर्नपनि शाहीले आग्रह गरेका छन् ।
‘राजनीतिमा यस्तो अप्ठेरो क्षण आउँछन्, जान्छन्। हामी डराउनुपर्ने, हताश हुनुपर्ने र आत्तिहाल्नु पर्ने हुँदैन। यंिहभित्र अझै पनि सम्भावनाको खोजी गर्न सकिन्छ। आउनुहोस् मिलेर अगाडि बढौं। हामी मिलेर अगाडि बढ्दा के सम्भव छैन ? नयाँ इतिहास निर्माण गर्न धैर्यता, आट, हिम्मत र साहस चाहिन्छ। तपाईं युवाहरूको भविष्यको लागि म जुनसुकै मूल्य चुकाउन तयार छु। तर अब निराश भएर अरू पार्टीमा प्रवेश गर्ने होइन, अब नयाँ ऊर्जा, थप जागरूकता र बलियो साहस बोकेर अगाडि बढौं,’ शाहीले सामाजिक संजालमा आफ्नो धारणा सार्वजनिक गर्दै भनेका छन् ।
नेता शाहीले पार्टीका नेताहरुलाई भगवान नबनाउन र प्रश्न गर्न आग्रह समेत गरे । ‘अरूलाई अर्ती दिन सजिलो छ । पार्टीमा नेतालाइ भगवान नबनाउ, नेतालाइ प्रश्न गर । तर आफ्नो पार्टीमा आफुलाइ भगवान नमान्नेलाई कारवाहीको डन्डा चलाउने, नेतृवलाई प्रश्न गर्ने र फरक मत राख्नेलाइ अब पार्टीले नचिन्ने र सदस्यता खारेज गरिदिने धम्की दिनु अनि लोकतान्त्रिक पार्टीमा फरक विचार राख्नेलाइ भक्तजन र हनुमानबाट गालीको बर्षा ?’ उनले अगाडि भनेका छन्,‘पार्टीमा फरक मत राख्नु, फरक विचार राख्नु, आफ्नो अडान राख्नु लोकतान्त्रिक अधिकार हो। फरक मतलाई सम्मान गर्नुको साटो निषेध गर्न खोज्नु निरंकुश र अलोकतान्त्रिक चरित्र हो।’
