काठमाडौं । दसैँको समयमा देशभर वर्षाको सम्भावना न्यून देखिएको छ । मौसमविद्हरूका अनुसार सोमबारदेखि आगामी ६ दिनसम्म देशका अधिकांश स्थानमा मौसम सफा रहने र ठूलो वर्षा हुने सम्भावना नरहेको देखिएको हो ।
मौसमविद् उज्जवल उपाध्यायले देशभर वर्षाको सम्भावना घट्दै गएको बताउँदै किसानलाई धानलगायतका बाली काट्न सुरु गर्न सुझाव दिएका छन् । उनका अनुसार तराईका क्षेत्रमा वर्षाको सम्भावना लगभग शून्य रहेको छ भने पहाड र हिमालका अधिकांश स्थानमा समेत वर्षा वा हिमपात हुने संकेत देखिएको छैन ।
उपाध्यायले सामाजिक सञ्जालमार्फत किसानलाई ढुक्क भएर धान तथा अन्य बाली भित्र्याउन आग्रह गरेका छन् । लामो समयसम्म परेको वर्षाका कारण भिजेको जमिन, खोला, तालतलैया र वनजंगलबाट हुने वाष्पीकरणका कारण भने केही सीमित स्थानमा स्थानीय वर्षा हुन सक्ने उनले बताएका छन् ।
विशेषगरी कास्कीको हेम्जा, लुम्ले, धम्पुसलगायत हिमाली क्षेत्रका दक्षिणी भूभागमा रहेका उपत्यका र गहिरा खोँचमा स्थानीय मौसमको प्रभावले वर्षा हुन सक्ने सम्भावना रहेको उनको भनाइ छ । यस्ता भूभागमा भने स्थानीय मौसमको अवस्थालाई ध्यान दिनुपर्ने उनले बताएका छन् ।
नवमी र दशमीको आसपास नेपालमा प्रभाव पार्न सक्ने अनुमान गरिएको न्यून चापीय प्रणालीसमेत कमजोर अवस्थामा रहेको उपाध्यायले स्पष्ट पारेका छन् । बंगालको खाडीबाट विकसित हुने उक्त प्रणालीको प्रभाव म्यानमार र दक्षिण भारततर्फ सीमित रहने देखिएकाले नेपालमा यसको प्रभाव न्यून हुने उनको भनाइ छ ।
यससँगै दसैँको समयमा घमाइलो र अनुकूल मौसम रहने सम्भावना बढेको छ । घाम लाग्ने क्रम बढेसँगै तराईका धेरैजसो स्थानमा तापक्रम ३० डिग्री सेल्सियसभन्दा माथि पुगेको मौसमविद्हरूले बताएका छन् ।
नेपाल मौसम विज्ञान विभागका मौसमविद् डेविड ढकालले पनि आगामी तीन दिन देशका कुनै पनि स्थानमा ठूलो वर्षा हुने सम्भावना नरहेको बताएका छन् ।
समग्रमा, आगामी केही दिन मौसम अनुकूल रहने सम्भावनाले दसैँको यात्रा, कृषि उपज भित्र्याउने काम तथा चाडपर्वका गतिविधिमा सहजता हुने अपेक्षा गरिएको छ । यद्यपि, स्थानीय भूगोल र मौसमको अवस्थाअनुसार केही स्थानमा सामान्य परिवर्तन हुन सक्ने भएकाले आवश्यक सतर्कता अपनाउनु उचित हुनेछ ।
