काठमाडौँ । भोटेकोशी बाढीले घरबारविहीन भएका परिवारलाई स्थायी आवास नबनेसम्म सरकारले मासिक खर्च उपलब्ध गराउने भएको छ । बाढी प्रभावित चार सदस्यसम्मको परिवारलाई हरेक महिना १५ हजार रुपैयाँ र चार जनाभन्दा बढी सदस्य भएमा थप प्रत्येक सदस्यका लागि २ हजार रुपैयाँ दिने निर्णय सरकारले गरेको हो ।
सञ्चारमन्त्री डा. विक्रम तिमिल्सिनाले सामाजिक सञ्जालमार्फत बाढी प्रभावित नागरिकको राहत, पुनर्स्थापना र पुनर्निर्माणलाई सरकारले उच्च प्राथमिकतामा राखेको जानकारी दिएका हुन् ।
गत बिहीबार बसेको मन्त्रिपरिषद् बैठकले भोटेकोशी बाढी प्रभावित परिवारलाई स्थायी आवास निर्माण नभएसम्म आवास भाडा तथा अन्य आवश्यक खर्च व्यवस्थापनका लागि उक्त रकम उपलब्ध गराउने निर्णय गरेको मन्त्री तिमिल्सिनाले बताएका छन् ।
चार जनाभन्दा बढी सदस्य भएको परिवारका लागि थप प्रत्येक सदस्यबापत मासिक २ हजार रुपैयाँ अतिरिक्त उपलब्ध गराइनेछ । यसरी परिवारमा सदस्य संख्या बढ्दै जाँदा उपलब्ध गराइने मासिक रकम पनि सोहीअनुसार बढ्नेछ ।
कुनै परिवारले नगद भाडा सुविधा लिन नचाहेमा सरकारले नै स्थायी आवास निर्माण नभएसम्म अस्थायी आवासको व्यवस्था गरिदिने विकल्पसमेत दिएको छ ।
मन्त्री तिमिल्सिनाका अनुसार राहत तथा आवास सुविधा उपलब्ध गराउन आवश्यक विवरण र तथ्याङ्क संकलनको प्रक्रिया अघि बढाइएको छ । यसका लागि सम्बन्धित सबै स्थानीय तहमा आवश्यक फाराम पठाइसकिएको छ ।
सरकारले स्थानीय तहबाट प्राप्त हुने विवरणका आधारमा प्रभावित परिवारको पहिचान गरी आवास भाडा वा अस्थायी आवासको सुविधा उपलब्ध गराउने तयारी गरेको छ ।
