काठमाडौं । बाँकेको कोहलपुरमा किरियापुत्री बसेको घरमा जुवा खेलिरहेको आरोपमा ५ जना पक्राउ परेका छन्। प्रहरीले उनीहरूको साथबाट २ लाख २ हजार ४४५ रुपैयाँ नगदसमेत बरामद गरेको छ।
पक्राउ पर्नेमा कोहलपुर नगरपालिका–१२ का ३६ वर्षीय धनबहादुर परियार, ३८ वर्षीय चन्द्रबहादुर बस्याल, ५६ वर्षीय बेलबहादुर डाँगी, ३६ वर्षीय राम गुरुङ र बैजनाथ गाउँपालिका–४ का ४३ वर्षीय कुलबहादुर वली रहेका छन्।
इलाका प्रहरी कार्यालय कोहलपुरबाट इन्स्पेक्टर कमल थापाको नेतृत्वमा खटिएको प्रहरी टोलीले उनीहरूलाई पक्राउ गरेको हो।
प्रहरीका अनुसार पछिल्लो समय बाँकेमा किरियापुत्री बसेको घरलाई जुवा खेल्ने स्थलका रूपमा प्रयोग गर्ने प्रवृत्ति देखिएको छ। जुवा खेल्ने समूहले किरियापुत्री बसेको घर खोज्दै त्यहाँ जुवातास खेल्ने गरेको प्रहरी अधिकारीहरूले बताएका छन्।
पक्राउ परेकामाथि थप अनुसन्धान भइरहेको प्रहरीले जनाएको छ।
